Առաջնորդ Հովնան սրբազանի հերթական այցելությունը <<Փոքրիկ հրեշտակներ>> շաբաթօրյա դպրոց

2023 թ․-ի ապրիլի 15-ին ԱՄՆ Արևմտյան թեմի բարեխնամ առաջնորդ, գերաշնորհ Տ․ Հովնան արք. Տերտերյանը հերթական այցելությունը կատարեց <<Փոքրիկ հրեշտակներ>> շաբաթօրյա դպրոց։ Աշակերտների համար Սրբազան հայրը միշտ սպասված հյուր է։ Առաջնորդը ծանոթացավ կատարվող աշխատանքներին, պատասխանեց աշակերտների հարցերին: Հանդիպումը վերածվեց մտերմիկ ու անկեղծ զրույցի։

Շուտով դպրոցում սկսվելու են ավարտական քննություններ, Հովնան սրբազանը հաջողություն մաղթեց աշակերտներին, իսկ ավարտական դասարանի սաներին հորդորեց ամուր պահել կապը դպրոցի և Մայր Եկեղեցու հետ։ Ուսուցիչներից տեղեկացավ աշակերտների առաջադիմության մասին՝ բարձր գնահատելով նրանց անձնուրաց ծառայությունը։

Այցելության ընթացքում առիթ եղավ հանդիպելու նաև դպրոցում կամավոր ծառայող պատանիներին, որոնց մեծ մասը նախկին աշակերտներ են։ Դպրոցի տնօրեն, բարեշնորհ Հովհաննես սարկավագ Գումրույանը տեղեկացրեց, որ նոր ուսումնական տարվա ընթացքում ծրագրվում է դասարանները համալրել արդիական տեխնիկական միջոցներով, հավելեց, որ դպրոցն ունի նաև իր վեբ կայքը՝ www.LASSWD.com։

2023-24 տարեշրջանը մեկնարկելու է օգոստոսի 19-ին։

Թղթակից