top of page

Հայաստանում Գիտության ու Նորարարության Զարգացման Հիմնադրամի Գալան Լոս Անջելեսում Կլինի Մայիսի 11ին


Հայաստանի գիտության եւ տեխնոլոգիաների հիմնադրամի (FAST) այս տարվա Advance Armenia Գալան Լոս Անջելեսում կկայանա Մայիսի 11-ին: Ձեռնարկի գլխավոր բանախոսն է՝ բժշկության ոլորտում Նոբելյան մրցանակի դափնեկիր, ամերիկահայ Արտեմ Փաթափությանը:




«Հիմնադրամի նպատակն է նպաստել Հայաստանի գիտական եւ տեխնոլոգիական առաջընթացին: Այս առումով, 2023 թ.ին մտադիր ենք ընդլայնել մեր հատկապես երկու՝ «Ըդվենս» դրամաշնորհային (Advance Grants) եւ «Արհեստական բանականության սերունդ» (Generation AI) ծրագրերը: Հայաստանում գիտության զարգացման հարցում կենսական է Սփյուռքի մասնակցությունը, եւ մեր առաջիկա ձեռնարկները տարբեր համայնքներում միտված են տեղեկացնելու եւ ներգրավվելու մեր հայրենակիցներին», Հունվարի 30-ին, Գլենդելում հայտարարեց FASTի հիմնադիր եւ գործադիր տնօրեն Արմեն Օրուջյանը:

Նա ներկայացրեց նախագծերը, որոնց իրականացումը հնարավոր է դառնում համահայկական ջանքերով: Advance դրամաշնորհային ծրագիրը միջազգային ճանաչում ունեցող գիտնականներին եւ հայաստանյան հետազոտողներին միավորող հարթակ է: Ձեւավորված խմբերն աշխատում են համատեղ՝ միջազգային մրցունակ հետազոտական նախագծերի վրա: «Ծրագիրը սկսվել է 50-60 գիտնականով, եւ յուրաքանչյուր դրամաշնորհ տեւելու է 2-4 տարի: Այս նախաձեռնությունը Հայաստանի երիտասարդ գիտնականներին աշխարհի հեղինակավոր հայ գիտնականների ու մասնագետների հետ աշխատելու հնարավորություն է տալիս», նշում է Օրուջյանը: Ըստ նրա, գիտության զարգացումը հաջողելու համար կարիք կա ապահովելու շարունակականություն՝ պատրաստելով նոր գիտնականների: Այս հարցը լուծելու համար, Հայաստանի գիտության եւ տեխնոլոգիաների հիմնադրամը, Հայաստանի ԿԳՄՍ նախարարության հետ համատեղ, նախաձեռնել է «Արհեստական բանականության սերունդ» նոր ծրագիրը: 2023 թ․-ից Հայաստանի մի շարք ավագ դպրոցների աշակերտներ հնարավորություն կստանան ուսումնասիրել եւ ծանոթանալ արհեստական բանականությանը: Այս տարվա Սեպտեմբերին, Երեւանի եւ հինգ մարզերի դպրոցների շուրջ 150 աշակերտ կստանա դասընթաց երկու մակարդակով, որոնցից մեկը նախատեսված է զարգացնել ու մաթեմատիկական եւ ալգորիթմիկ մտածելակերպ, իսկ հաջորդ փուլում կտրվեն Արհեստականբանականության ուղղությամբ տեսական եւ գործնական խորացված գիտելիքներ ու հմտություններ։

Արմեն Օրուջյանը նշում է, որ հիմնադրամի ծրագրերի իրականացումը մեծապես հնարավոր է դառնում սփյուռքի ներգրավման շնորհիվ: Հիմնադրամի մի շարք ծրագրերի մեկնարկը տրվել է 2022 թ.-ին Լոս Անջելեսում անցկացված կազմակերպության առաջին գալա-դրամահավաքի արդյունքում հավաքված 1.4 միլիոն դոլար նվիրատվությունների շնորհիվ:

Հիմնադրամի ծրագրերը Սփյուռքին ներկայացնելու եւ ամերիկահայերի մասնակցությունն ապահովելու նպատակով, FASTը Մայիսի 11-ին Լոս Անջելեսում կանցկացնի իր երկրորդ գալա-դրամահավաքը: Հիմնադրամի ղեկավարն ու կազմակերպիչ հանձնախմբի ներկայացուցիչները կոչ են անում համայնքին միանալու Հայաստանում գիտության ու նորարարական տեխնոլոգիաների զարգացման գործին:


Ն. Ճարտար

Commentaires


bottom of page