Շնորհավոր Նոր տարի և Ս․ Ծնունդ - 2026թ․
- gumruyan
- Jan 3
- 1 min read
Սիրելի՛ ընթերցողներ,
Երբ 2026 թվականի Նոր տարվա առաջին զանգերն են հնչում, և Սուրբ Ծննդյան աստվածային լույսն իջնում է մեր սրտերի վրա, ժամանակն է կանգ առնելու, խորհելու ու նորից զգալու՝ ո՞վ ենք մենք և որտեղի՞ց ենք գալիս։ Ձյունածածկ օրերի լռության մեջ հառնում է հայի անանց ոգին՝ դարերով կոփված հավատքով, հիշողությամբ ու հայրենասիրությամբ։
Ամերիկայի Միացյալ Նահանգների հեռավոր ափերից՝ ազատ խոսքի ու պատասխանատու լրագրության միջավայրում, HayLurUsa լրատվական ծառայությունն իր ձայնն է բարձրացնում ոչ միայն որպես լրատվամիջոց, այլ որպես ազգային առաքելություն։ Այստեղ, օվկիանոսից այն կողմ, մեր խոսքը միահյուսվում է հայրենի հողի շնչին, Հայաստանի կարոտին ու հույսին, Սփյուռքի զարկերակին։ Մենք գործում ենք, որպեսզի ճշմարտությունը չխամրի, իսկ հայի ձայնը՝ չլռի։
Այս լուսավոր տոներին թո՛ղ ձեր տներում վառվի ոչ միայն տոնածառի լույսը, այլ նաև հայրենի օջախի անմար կրակը։ Թո՛ղ Նոր տարին բերի խաղաղություն մեր ժողովրդին, զորություն՝ մեր միասնականությանը, և իմաստություն՝ բոլոր հարցերում։ Թո՛ղ Սուրբ Ծննդյան խորհուրդը մեզ հիշեցնի, որ որքան էլ հեռու լինենք աշխարհագրորեն, մեր սրտերը խարսխված են նույն արմատներին, նույն պատմությանը, նույն ապագային։
HayLurUsa-ը նոր տարում ևս կմնա հավատարիմ իր կոչմանը՝ ԱՄՆ-ից աշխարհին պատմել հայի ճշմարտությունը, պահել ազգային հիշողության կենդանի ջահը և ծառայել ողջ հայությանը՝ ազնիվ խոսքով ու արդիական լուրերով։
Շնորհավո՜ր Նոր տարի և Սուրբ Ծնունդ։
Թող 2026 թվականը լինի լույսի, հավատքի, հայրենասիրության հաղթանակների տարի։
Comments