top of page

Ս. Գրիգոր Լուսաւորիչ Եկեղեցւոյ «Փեթակ» Շաբաթօրեայ Դպրոցը Տօնեց Ս․ Ծնունդը եւ Նոր Տարին


23 դեկտեմբերի, 2023 թ․, շաբաթ օր ցնծուն եւ խանդավառ օր էր Քալիֆորնիոյ Փասատենա քաղաքի Ս. Գրիգոր Լուսաւորիչ եկեղեցւոյ «Փեթակ» շաբաթօրեայ դպրոցի մէջ: Տօնական հագուստներ հագած աշակերտներ, ծնողներ, մեծ հայրեր եւ մեծ մայրեր Մանուկ Յիսուսի ծննդեան օրը տօնելու համար, մոմեր բռնած մտան տաճար եւ ներկայ եղան աշակերներու համար պատրաստուած արարողութեան:

Եկեղեցւոյ հոգեւոր հովիւ, արժանապատիւ Տ․ Սարգիս աւ. քահանայ Փեթոյեան սիրալիր խօսքերով դիմաւորեց դպրոցի սաները, ապա սկսաւ փոքրիկներուն հասկնալի եւ կատակախառն լեզուով բացատրել Յիսուսի ծննդեան իմաստը: Աշակերտները ընթերցումներով, տէր Սարգիսի հարցումներուն բարձրաձայն պատասխաններ տալով աշխոյժ մաս կազմեցին այս քարոզ-դաստիարակութեան:

Ապա, աշակերտները բեմ ելան եւ երգի ուսուցչուհի Մարալ Քիւրտեանի առաջնորդութեամբ երգեցին <<Տէրունական աղօթք>>-ը եւ տօնական հոգեւոր երգեր: Աշակերտները հաղորդութիւն ստացան դպրոցի ուսուցչուհի Ազնիւ Սէրայտարեանի մենակատարած ընտիր շարականներու ստեղծած խորհրդաւոր մթնոլորտի մէջ:

Օրը երկրորոդ երանգ ստացաւ <<Տունայեանց>> սրահի մէջ: Հայկական նոր տարուայ ուրախ երգերով աշակերտները եւ հիւրերը լեցուցին սրահը: Ապա, բոլոր երեխաները բեմի վրայ ժպտադէմ երգեցին Կաղանդ Պապային, Ամանօրին, լուսաւոր եւ զարդարուած տօնածառին նուիրուած երգեր: Աշակերտները երգեցին նաեւ «Խաղաղ գիշեր» երգը, որուն խօսքերը կը պատկանին Լեւոն Շանթին, իսկ երաժշտութիւնը՝ Բարսեղ Կանաչեանին:

Եւ հասաւ սպասուած պահը. Կաղանդ Պապան իր պղնձեայ ձեռնազանգակը հնչեցնելով, աւետելեով Նոր Տարին, ուրախութեան պոռչտուքներու մէջ մուտք գործեց սրահ: Ան փառաւորապէս բազմեցաւ իր գահի վրայ, բացատրեց, թէ Արարատի վրայ կուտակուած առատ ձիւնի պատճառով քիչ մը ուշացած է, ջերմ զրոյցներ ունեցաւ իւրաքանչիւր սանիկի հետ, ապա անոնց տուաւ սիրուն նուէրներ:

Այս բացառիկ յայտագիրը աւարտեցաւ ախորժաբեր սեղանի շուրջ, ու զարդարուած էր դպրոցի մայրերու կողմէ բերուած հայկական աւանդական ճաշատեսակներով:

«Փեթակ» շաբաթօրեայ դպրոցը կը շնորհաւորէ Նոր Տարին, բոլորին մաղթելով խաղաղութիւն եւ երջանկութիւն:



Հաղորդագրութիւն՝ դպրոցէն

ความคิดเห็น


bottom of page