Զատիկը Լաս Վեգասում

2024 թ․-ի մարտի 28-ին, Ավագ Հինգշաբթի երեկոյան, Լաս Վեգասի Ս․ Կիրակոս եկեղեցում, հոգևոր արարողությունների ժամանակ, սուրբ խորան էին բարձրացել նաև <<Սեդա Թաջիրիան>>-ի անվան շաբաթօրյա դպրոցի արական սեռի սաները։ Նրանք հագել էին եկեղեցական շապիկներ և սրտի տրոփյունով սպասում էին Ոտնլվային։

Ոտնլվան կատարվեց շատ գեղեցիկ ձևով։ Տեսնել էր պետք, թե ինչպես Լաս Վեգասի հոգևոր հովիվ, հոգեշնորհ Տ ․ Սասուն ծ․ վրդ․ Զմրուխտյանը, Քրիստոսի օրինակով ծնկաչոք լվանում էր նրանց ոտքերը։ Այդ արարողությունն ընդմիշտ կմնա երեխաների հիշողության մեջ։

Ավագ շաբաթ առավոտյան ժամը 10-ին դպրոցի աշակերտներն ու ուսուցիչները, ամեն անգամվա նման հավաքվել էին եկեղեցում, որտեղ կատարեցին առավոտյան աղոթքը։ Այնուհետև սկսվեց առաջին դասը, որից հետո բոլոր աշակերտները եկան դպրոցի մեծ սրահը։

Այստեղ ուսուցիչներն ու ծնողները ս․ Զատիկին նվիրված պաճունճանքով զարդարել էին սեղանները և այնտեղ դրել տոնին համապատասխան ուտելիքի բազմաթիվ տեսակներ։ Հատկապես աչքի էին ընկնում վառվռուն գույներով ներկած ձվերը, չամիչով փլավը, թխվածքների և շատ ու շատ այլ ուտեստները։

Օրն անցավ շատ ուրախ։ Երեխաները հյուրասիրվեցին և տարբեր խաղեր խաղացին։ Աշակերտների հետ ուրախացան նաև նրանց ծնողները։

Քրիստոս Հարյավ Ի Մեռելոց։

Օրհնյալ է Հարությունը Քրիստոսի։

Լաուրա Խլղաթյան