ՄԱՏԵՆԱԴԱՐԱՆԻ ՏՆՕՐԷՆ ԱՐԱ ԽԶՄԱԼԵԱՆ ՊԱՏՐԻԱՐՔԱՐԱՆ ԱՅՑԵԼԵՑ

Երեւանի Մաշտոցեան Մատենադարանի Տնօրէն Արա Խզմալեան 25 Սեպտեմբեր 2025, Հինգշաբթի միջօրէին այցելեց Պատրիարքարան եւ ընդունուեցաւ Պատրիարքական Փոխանորդ Արժ. Տ. Գրիգոր Աւ. Քհնյ. Տամատեանի կողմէ։

Մեծայարգ հիւրին կ'ուղեկցէին Տնօրէնի օգնական Տաթեւիկ Մուրատեան եւ Սոնա Բալոյեան։ Հիւրերը, որոնք կարճատեւ այցելութեամբ կը գտնուէին Իսթանպուլ, իրենց քաղցր պարտականութիւնը նկատած էին այցելել Պատրիարքարան եւ ծանօթանալ Թուրքիոյ հայոց հոգեւոր կեդրոնին։

Տէր Հայրը բարի գալուստ մաղթեց հիւրերուն, որոնք շնորհակալութիւն յայտնեցին ընծայուած ընդունելութեան համար։ Հանդիպման ընթացքին գաղափարի փոխանակութիւններ եղան ձեռագրերու գիտական ուսումնասիրութեան շուրջ, քանի որ անոնք անցեալէն փոխանցուած բարոյական հարստութիւններ են եւ անոնց ուսումնասիրութիւնը կարեւոր է մշակութային եւ հոգեւոր զարգացման համար։ Տէր Հայրը անցեալ տարի օրհնութեամբ Ն.Ա.Տ. Սահակ Բ. Պատրիարք Հօր, մասնակցած էր Մատենադարանի նախաձեռնութեամբ կազմակերպուած Հայագիտական Միջազգային Համաժողովին, ուր գոյացած էր այն հասկացողութիւնը, թէ ձեռագիրները պէտք է պահպանուին իրենց գտնուած վայրերուն մէջ եւ մասնագէտները գիտական մերձեցումով կարելիութիւն պէտք է ունենան անոնց նկարագրութիւնները կատարելու եւ պարունակութեանց հաղորդ դառնալու՝ կատարելի ուսումնասիրութեանց համար։

Արա Խզմալեան Մատենադարանի աշխատութեանց մասին տեղեկութիւններ տուաւ եւ նուիրեց Մատենադարանի հրատարակութիւններէն նմոյշներ։ Շնորհաւորեց Պատրիարք Հօր հովանաւորութեամբ, Պատրիարքարանի մէջ կատարուած մատենագիտական աշխատութիւնը։ Ան նաեւ պատրաստակամութիւն յայտնեց պէտք եղած օժանդակութիւնը ընծայելու ձեռագրերու եւ հնատիպ գիրքերու առողջ պահպանութեան համար եւ կարեւոր գիտելիքներով օժտելու ծառայողները՝ ի սէր գիտութեան։

Ընդունելութեան աւարտին հիւրերը Տէր Հօր առաջնորդութեամբ շրջեցան Պատրիարքարանի սրահները եւ այցելեցին Աթոռանիստ Մայր եկեղեցի եւ տեղեկութիւններ ստացան տաճարի եւ համալիրի մասին։ Տէր Հայրը հիւրերուն նուիրեց Պատրիարքական Աթոռի հրատարակութիւններէն օրինակներ, փոխանցեց նաեւ Պատրիարք Հօր օրհնութիւններն ու ողջոյնները։ Հիւրերը գոհունակութեամբ հրաժեշտ առին Պատրիարքարանէն։

Մարմարա