Իզապէլ Պայրագտարեան՝ հայ երգի ու աղօթքի դարաւոր արձագանգներով

Կան մեղեդիներ, որոնք միայն ականջով չեն լսուիր։ Անոնք կը հասնին սրտին, կ՚արթնցնեն յիշողութիւններ եւ մեզ կը վերադարձնեն այն ակունքներուն, ուրկէ սկիզբ կ՚առնեն մեր պատմութիւնն ու ինքնութիւնը։

Լոս Անճելըսի հայ համայնքը Կիրակի, 1 Նոյեմբեր 2026-ին, երեկոյեան ժամը 5-ին, առիթ պիտի ունենայ մասնակից դառնալու բացառիկ երաժշտական երեկոյի մը։ Արեւմտեան թեմի առաջնորդ Բարձրաշնորհ Տ. Յովնան Արք. Տէրտէրեանի բարձր հովանաւորութեամբ եւ «Զուարթնոց» մշակութային միութեան կազմակերպութեամբ, Պըրպէնքի Սրբոց Ղեւոնդեանց Հայկական Մայր Տաճարին մէջ տեղի պիտի ունենայ «Անցեալի երգեր, աղօթքներ եւ օրօրոցայիններ» խորագրով համերգը՝ հանդիսատեսը առաջնորդելով հայկական երաժշտական ու հոգեւոր ժառանգութեան հարուստ աշխարհը։

Համերգի գլխաւոր կատարողը պիտի ըլլայ աշխարհահռչակ հայազգի սոփրանօ Իզապէլ Պայրագտարեան, իսկ իբրեւ յատուկ հիւր հանդէս պիտի գայ Գէորգ Մուրատ։

Համերգը կը խոստանայ ըլլալ ոչ միայն բարձրարուեստ երաժշտական ներկայացում, այլեւ հոգեւոր ու մշակութային վերադարձ դէպի մեր ազգային ակունքները։

Երգեր՝ որոնք սերունդները իրարու կը կապեն։ Աղօթքներ՝ որոնք դարերու խորքէն հասած են մեզի։ Օրօրոցայիններ՝ որոնց մեղեդիներուն մէջ տակաւին կը հնչէ մեր ժողովուրդի ձայնը։

Այս բացառիկ ձեռնարկը առիթ պիտի ընծայէ վերապրելու հայկական երաժշտական ժառանգութեան թանկարժէք գանձերը՝ այն ստեղծագործութիւնները, որոնք ժամանակի սահմանները հատելով հասած են մեզի եւ այսօր եւս ունին նոր սերունդներու հոգիներուն դպչելու ու անոնց սրտերուն մէջ ազգային պատկանելիութեան զգացումն արթնցնելու ուժը։

Ասիկա պարզապէս համերգ մը չէ։ Ան վերադարձ մըն է դէպի մեր արմատները, մեր հոգեւոր ժառանգութիւնն ու այն երգը, որ դարեր շարունակ ապրած է մեզմով եւ պիտի շարունակէ ապրիլ գալիք սերունդներուն մէջ։

Համերգի մասին յաւելեալ տեղեկութիւններ ստանալու, տոմսեր ապահովելու կամ տեղեր ամրագրելու համար կրնաք կապ հաստատել Լենա Սիմոնեանի՝ (818) 383-1322, կամ Սետա Ժաւորի՝ (818) 599-4618 հետ։

Եկէ՛ք ունկնդրելու այն մեղեդիները, որոնք անցեալը կը կամրջեն ներկային։Եկէ՛ք միասին վերապրելու հայկական երգի, աղօթքի եւ օրօրոցայինի անանց ժառանգութիւնը։

Թղթակից